WAZAZI WAHIMIZWA KUENDELEA KUCHANGIA CHAKULA MASHULENI

Posted on: May 10th, 2025

Wazazi na Walezi wa wanafunzi wa shule za Msingi Sabasaba, Mapinduzi na Azimio zilizopo kata ya Sabasaba Halmashauri ya Mji Tarime wamehimizwa kuendelea kuchangia chakula kwa watoto wao katika shule hizo ili kuongeza ufanisi wa watoto hao wawapo mashuleni

Hayo yamesemwa na mwakilishi wa Mkuu wa Wilaya Tarime Bw. James Nyange kwenye kikao cha wazazi wa shule hizo kilichofanyika Mei 9, 2025 katika viwanja vya shule hizo

"Mhe. Mkuu Wilaya ya Tarime Meja Edward Flowin Gowele amenituma kuwasihi tuendlee kuwasaidia hawa watoto kwa pamoja kwani wakila chakula shuleni tutaongeza ufaulu, tutaounguza utoro na kuwafanya wapende shule" amesema Nyange

Aidha, ameziahidi shule hizo kuwa ofisi ya Mkuu wa Wilaya ya Tarime itaendelea kutafuta wadau mbalimbali kwaajili ya kushiriki zoezi hilo la kuchangia chakula mashuleni katika Wilaya yote ya Tarime

Kwa upande wake Mwenyekiti wa Halmashauri ya Mji Tarime Mhe. Daniel Komote ameziunga mkono shule hizo kwa kuchangia gunia moja la mahindi